Esta mañá tivemos a sorte de contar con Iago, o pai de Gael, que veu ao noso centro para falarnos do fascinante mundo do marketing nas empresas. A súa explicación foi sinxela, clara e chea de exemplos que nos axudaron a entender conceptos que vemos a diario.
Iago explicounos a importancia de crear unha marca, de definir quen somos e que queremos transmitir. Falounos tamén da visión e da misión dunha empresa:
- A misión é aquilo que a empresa fai cada día, o seu propósito presente.
- A visión é cara onde quere chegar no futuro, o soño que guía todos os seus pasos.
Grazas a isto, comprendemos mellor como se constrúe unha identidade forte e coherente.
Ademais, aprendemos o valor do storytelling, esa maneira de contar historias que conecta coas emocións das persoas. Para poñelo en práctica, creamos os nosos propios storytelling para vender unhas pulseiras, imaxinando personaxes, situacións e mensaxes que fixesen o produto máis atractivo.
Por último, descubrimos como funciona a publicidade e de que xeitos as empresas poden chamar a atención dun modo creativo e responsable.
Foi unha sesión moi enriquecedora, na que puidemos facer preguntas, compartir ideas e vivir de primeira man como funciona o marketing.
Moitas grazas, Iago, por compartir connosco o teu tempo e o teu coñecemento!
